უფალო! უსმინე შევარდენს
მის ხელით გიგზავნი ბარათს,
მიშველე ღორებში ჩავარდნილს
ღორებში დარჩენილს მარად.
როგორც რომ ბურვაკი პალოზე
ახოში ბაწარით აბია,
მარტო ვარ, უფალო დალოცე
მეღორე ცრემლების ყლაპია!
უფალო! მომეცი სამხარი
ძაღლივით ამოსულს ცაზე
და შენი პერანგი ნახმარი
ჩამაცვი ცოდვიან ტანზე.
მომეცი ბავშებში ჩარევის
და მათთან თამაშის ნება,
უფალო! შენს გარდა არავის
არა აქვს ამის უფლება.
ფიქრები სამწყემსო ღორებზე
ყოველ დღე ცრემლებით მსჯიდა,
უფალო! გალავნის ყორეზე
დამნიშნე ბეღურა ჩიტად.